राक्सिराङमा चेपाङ दम्पतिको ओडारमा बास भन्दै भिडियो आएपछि बिरोध

चितवन आसपास

Home
चितवन आसपास
राक्सिराङमा चेपाङ दम्पतिको ओडारमा बास भन्दै भिडियो आएपछि बिरोध

राक्सिराङमा चेपाङ दम्पतिको ओडारमा बास भन्दै भिडियो आएपछि बिरोध

शुक्रवार, मंसिर २६, २०७७ ज्ञानेन्द्र तामाङ

मनहरि । राक्सिराङ गाउपालिका वडा नं ८ को चेपाङ दम्पति ओडारमा बस्ने गरेको भन्दै एक भिडियो सार्वजनिक भएपछि चेपाङ अगुवाहरुले त्यसको बिरोध गरेका छन् । जयमसिह टिभी नामक युटुब च्यानलबाट सार्वजनिक गरिएको भिडियोमा समाजिक अभियान्ता बताउने सोनाली पुनले चेपाङ दम्पतिसँग ओडारमै पुगेर कुराकानी गरेकाे देखाइएको छ । पुनले ती दम्पतिको दुख, संघर्ष र मायाप्रेम लाई जोड दिदैं यस्तो दुखीहरुलाई सहयोग गर्न आग्रह गरेको देखिन्छ ।

तर सो भिडियो पुर्ण रुपमा झुटो रहेको नेपाल चेपाङ संघ राक्सिराङ ८ वडाकमिटिका अध्यक्ष महेश चेपाङ बताउनुहुन्छ । उहाँले भिडियोमा देखाइएको दम्पति चिनजानकै भएको र उनीहरुको बास ओडारमा नभएको बताउनुभयो । 'ती दम्पतिको घर भुकम्पको पैसाले बनाइएको छ' : उहाँले भन्नुभयो : 'उनीहरू भिडियोमा देखाइएजस्तो ओडारमा बसेका छैनन् ।' विकट गाउँमा चेपाङ समुदायको दयनिय अवस्था देखाएर बिदेशी संघसंस्था बाट ठुलो सहयोग संकलन गर्ने र चेपाङको नाम बेचेर फाइदा लिने योजनाले सो भिडियो हालिएको उहाँको दाबी छ । 'चेपाङको दयनीय अवस्था देखाएर एनजिओ/आइएनजिओ बाट ठुलो रकम उठाउने योजनाले भ्रामक भिडियो हालिएको छ, यसको चेपाङ संघ वडा कमिटी विरोध गर्दछ' : उहाँले भन्नुभयो ।

राक्सिराङ ८ का वडा अध्यक्ष रामकृष्ण प्रजाले पनि आफ्नो वडामा कोहिपनि चेपाङको बास ओडारमा नभएको बताउनुभयो । भिडियोमा देखाइएको दम्पति चिनजानकै भएको र उनीहरुको अवस्था भिडियोमा भनिएजस्तो दयनिय नरहेको उहाँले पुष्टि गर्नुभयो । 'उहाँहरु श्रीमान श्रीमती दुवैले समाजिक सुरक्षा भत्ता समेत बुझिरहनुभएको छ' : उहाँले भन्नुभयो : 'भुकम्प को घर बनेको छ, जनता आवासको पनि छ ।' भ्रम फैलाएर सहयोग संकलन गरि फाइदा लिने उद्देश्यले भिडियो हालिएको उहाँले बताउनुभयो । भिडियो निर्माण गर्ने व्यक्तिबारे बुझ्ने र थप जानकारी लिने प्रयास भइरहेको उहाँले भन्नुभयो ‌। गलत समाचार सम्प्रेषण गरि भ्रम सिर्जना गर्ने लाई कानुनसम्मत कारबाही गरिने उहाँको भनाई छ । राक्सिराङका विभिन्न स्थानमा बिपन्न चेपाङको नाममा सहयोग उठाउने र अगुवा तथा अभियान्ता बताउनेहरुले फाइदा लिने गरेको घटनाहरु सार्वजनिक हुने गरेका छन् ।

प्रकाशित मिति: शुक्रवार, मंसिर २६, २०७७, ११:३९:००